VISION PEDAGOGICO

e vision pedagogico

Ta consisti di 6 punto basico. E meta ta pa tur hende na Aruba y specialmente tur mayor cera conoci cu e 6 puntonan basico pasobra lanta un mucha ta responsabilidad di nos tur.

1. Lanta bo yiu den un ambiente safe y amoroso

  • Un cas sigur.
  • Un scol sigur cu un bon ambiente y cu e nivel escolar ta uno adecuado pa bo yiu.
  • Un lugar confiabel na unda bo yiu por keda despues di scol.
  • Un ambiente di amor, kiermen cu bo ta duna bo yiu hopi cariño, atencion, brasa y sunchi.
  • Hunga hunto cu bo yiu weganan, sin wordo stroba door di telefon.
  • Por ultimo: mester ta consciente cu un mayor ta e ehempel pa su yiunan.

2. Apoyo positivo, guia y pasa tempo hunto

  • Purba di ta consciente cu e manera cu abo a wordo lanta tin influencia ariba e manera cu bo ta lanta bo yiu.
  • Busca un balansa entre ta estricto y laga un tiki mas los; bo yiu mester haya chens pa haci cos robes; p.e. haña un punto malo na scol. Abo lo por gui’e e momento ey sin bira.
  • Dune compliment tur dia, pa su esfuerzo tambe.
  • Tin comprension pa bo yiu su insiguridad, e ta un emocion di berdad na e momento ey.
  • Pasa tempo hunto p.e. come hunto na mesa, combersa den auto, haci wega pafo etc.

3. sea realistico

  • Cada mucha ta desaroya den su mesun tempo; abo como mayor mester ta consciente cu cada edad ta bin cu diferente punto importante di kico un mucha lo por haci.
  • Cada hende sea ta mucha of adulto mag di haci fout, bo ta siña semper di dje.
  • Bo mester ta consciente cu tambe tin otro hende cu ta yuda bo yiu desaroya p.e. docente na scol, coach di deporte, lider di creche.
  • Abo como mayor mester tin un bon contacto cu nan pa yuda bo yiu miho.
  • No lubida di ta realistico di bo mesun desaroyo como mayor, bo mester duna bo mes un chens pa siña.

4. disciplina positivo

  • Sea claro na bo yiu; duna un splicacion kico por y no por.
  • Sea consecuente tocante cua comportacion mag y cua comportacion no mag.
  • Brinda bo yiu safety kiermen no zundra, grita of duna un klap pero pone consecuencia fiho cu ta fit na e edad di bo yiu.
  • Laga bo yiu yuda soluciona e problema door di dun’e un escohencia entre 2 opcion.
  • Percura cu esun cu ta yuda educa bo yiu (pareha;welo;wela) ta riba un liña.
  • Semper haci tur lokual cubo ta bisa cu bo lo haci dus no keda menasa bo yiu y no haci nada.
  • Duna compliment bo yiu tur dia.

5. cuida bo mes

  • Come saludabel.
  • Drumi suficiente.
  • Busca un balansa entre trabou, lanta bo yiu, tempo cu famia, sali cu amigo, haci deporte etc.
  • Purba di tin un bon contacto cu e otro mayor si boso ta biba hunto of no hunto e comunicacion mester t’ey y ta positivo pa e bienestar di boso yiunan.
  • Si bo tin stress bo mester ta consciente cu esaki lo tin influencia riba e manera di reacciona, bo por papia esaki cu bo yiu uzando palabra cu ta fit na su edad.

6. busca sosten y ayudo

  • Lanta bo yiu ta un reto grandi, cada edad tin su reto nobo; bo ta haci’e cu tur bo esfuerzo y hopi amor pero tin biaha bo no sa con pa soluciona cierto cos.
  • Semper bo por pidi sosten, conseho of yudansa cerca bo famia, amigonan, lider di creche, docentenan of cerca un otro professional. No duda tocante pidi sosten, bo no ta un mal mama of tata si bo no sa kico pa haci na cierto momento.

Pa conseho of sosten por tuma contacto libremente cu Tienda di Educacion na 161 y Fundacion pa Nos Muchanan na 588-0856.