KEN NOS TA?
Tienda di Educacion ta pa mama, tata, wela, welo, madrastra, padrastro y tur otro educadornan.
Pues pa tur hende cu ta encarga cu cuido di mucha y hoben di 0 pa 18 aña di edad cu ta sinti e necesidad pa papia cu un profesional cu ta scucha, duna sosten, informa y conseha si bo tin un pregunta tocante educacion y desaroyo di un mucha.
VISION TIENDA DI EDUCACION ARUBA
Tienda di Educacion Aruba su punto di operacion vocal ta basa riba articulo 18, di e derecho di mucha.
E articulo ta pone enfasis riba e desaroyo y educacion di e muchanan y e responsabilidad di e mayor of voogd legal.
Tienda di Educacion ta sali for di e punto di bista (vision) cu cada mayor/educador tin e boluntad, habilidad y talento pa yega na solucionnan responsabel pa loke ta trata criansa di nan yiu(nan).
MISION TIENDA DI EDUCACION ARUBA
Tienda di Educacion tin como mision pa sostene mayornan, cuidadornan y educadornan di mucha y hoben entre e edad di 0-18, cu tin preguntanan relaciona cu desaroyo di mucha y hoben, door di duna guia adecuado y profesional pa engrandece e mayor, cuidador y educador su conocemento y capacidad. Pa asina por atende e mucha y hoben, maneha y resolve e retonan cu nan ta experenciando na un manera responsabel, sensitivo y responsivo.